Minisiteri y’Ubuzima yatangaje ko kuri iki Cyumweru tariki ya 9 Gicurasi 2021, mu Rwanda habonetse abarwayi bashya 66 batumye abantu bamaze gutahurwaho na COVID-19 guhera muri Werurwe 2020 bagera ku 25,652.
Uyu munsi hakize abantu bashya 34, bituma abamaze gukira icyorezo cya COVID-19 mu Rwanda bagera ku 24,153 bangana na 94.1% by’abatahuweho uburwayi bose. Abarwayi bakirimo kwitabwaho n’abaganga babaye 1,161 muri bo hakaba nta n’umwe urembye ubarimo, hakaba nta n’uwapfuye ku buryo umubare w’abamaze guhitanwa na cyo ukiri kuri 338 bangana na 1.3% by’abatahuweho icyo cyorezo
Guhera ku wa Kane tariki ya 6 kugeza kuri iki Cyumweru ku ya 9 Gicurasi 2021 hashize iminsi ine nta muntu wishwe n’icyorezo cya COVID-19 ndetse hanagiye hagaragara igabanyuka ry’imibare mishya y’abandura guhera mu ntangiriro z’uku kwezi kwa Gicurasi.
Ikindi cyagiye kigaragara muri iyi minsi ni uko abarwayi barembye bagabanyutse ugereranyije n’igihe cyo mu kwezi gushize, by’umwihariko mu minsi itanu hadatangazwa umurwayi n’umwe urembye.
Abarwayi bashya babonetse barimo abo mu Karere ka Gicumbi 27, Karongi 18, Nyamasheke 8, Umujyi wa Kigali 5, Ngoma 3, Rubavu 2, Rusizi 2, Nyaruguru 1, Kamonyi 1, na Ngororero 1.
Kugeza ubu mu Rwanda abarwayi batahuweho iki cyorezo bose bamaze kuboneka mu bipimo 1,344,650 birimo 3,481 byafashwe mu masaha 24 ashize.
Imibare itangazwa kuri Afurika igaragaza ko abamaze gutahurwaho icyorezo cya COVID-19 ku mugabane basaga miliyoni 4.6 barimo miliyoni 4.1 z’abamaze gukira, n’abarenga ibihumbi 124 bamaze kwamburwa ubuzima na cyo.
Ku Isi, abamaze kwandura muri rusange barakabakaba hafi miliyoni 158 barimo miliyoni 136 z’abakize ndetse na miliyoni 3.3 z’abantu bamaze kubura ubuzima kubera icyo cyorezo.
NIKUZE NKUSI Diane
